Uqanda Konqo vətəndaşları üçün 21 günlük karantin tətbiq edib

Uqanda Ebola virusunun yayılmasının qarşısını almaq üçün sərt tədbirlərə əl atıb.

hadiseler.info xəbər verir ki, Uqanda Konqo Demokratik Respublikasından qayıdan vətəndaşlar üçün 21 günlük karantin rejimi tətbiq edib. Bu barədə ölkənin səhiyyə naziri Kris Baryomunsi oktyabrın 25-də açıqlama verib.

Nazir bildirib ki, Uqandada hazırda Ebola epidemiyası qeydə alınmasa da, qonşu ölkələrdəki təhlükəli vəziyyətlə əlaqədar sərhəd-keçid məntəqələrində və Entebbe Beynəlxalq Hava Limanında tibbi nəzarət maksimum dərəcədə gücləndirilib. Məlumata görə, daha əvvəl Keniyada və Nigeriyada Ebola aşkarlanan şəxslərin Uqandadan keçdikləri müəyyən edilib. Nigeriyada qeydə alınan yoluxma halının genetik analizi virusun Keniyada aşkarlanan ştammla yaxın əlaqəsini göstərsə də, xəstələr arasında birbaşa təmas hələlik təsdiqlənməyib.

Uqanda rəsmiləri virusun ölkə ərazisinə mümkün daxilolma və yayılma yollarını diqqətlə araşdırdıqlarını bəyan ediblər.