Yapon jurnalist Rusiyada nəyi axtarırmış?

Saxalində casusluq şübhəsi ilə saxlanılan yaponiyalı jurnalist İmai Yukinin iş yerində və əşyaları arasında məxfi arxiv sənədlərinin sürətləri tapılıb.

hadiseler.info xəbər verir ki, bu barədə Rusiya Federal Təhlükəsizlik Xidmətinin yaydığı rəsmi məlumatda bildirilir.

Axtarışlar zamanı yapon müxbirin iş masasında FSB tərəfindən məxfiliyi ləğv edilmiş “Yaponiyanın SSRİ-yə qarşı bakterioloji müharibə hazırlığı haqqında” xüsusi məruzənin nüsxələri aşkarlanıb. Həmin sənədlərdə Yaponiyanın “Dəstə №731” vasitəsilə insanlar üzərində taun, vəba, yatalaq və qara yara kimi təhlükəli xəstəliklərin törədiciləri ilə təcrübələr aparmasına dair faktlar yer alır.

Oktyabrın 13-də Saxalində saxlanılaraq Moskvaya gətirilən jurnalist, həmçinin Yaponiyanın xüsusi xidmət orqanlarına Rusiyanın hərbi səfərbərlik və könüllü sayı barədə məlumat toplamaqda təqsirləndirilir. Rusiya XİN-in rəsmi nümayəndəsi Mariya Zaxarova hadisənin təsadüfi olmadığını bəyan edib.