200 il sonra ilk dəfə qadın edam ediləcək

ABŞ-ın Tennessi ştatında 1819-cu ildən bəri ilk dəfə bir qadının barəsində çıxarılan ölüm hökmünün icrasına hazırlıq görülür.

hadiseler.info “Lent.az”a istinadən xəbər verir ki, ölüm cəzasına məhkum edilən şəxs Krista Paykdır. Onun edamının sentyabrın sonunda gerçəkləşdirilməsi nəzərdə tutulur.

Krista Payk 1995-ci ildə, 18 yaşı olarkən digər şəxslərlə birgə 19 yaşlı Kollin Slemmeri meşəlik əraziyə apararaq döyüb, ona çoxsaylı bıçaq xəsarətləri yetirərək amansızlıqla qətlə etirib. O, öldürdüyü şəxsin kəllə sümüyünün bir hissəsini özündə saxlayıb və 1996-cı ildə məhkəmə qərarı ilə ölüm cəzasına məhkum edilib.

Paykın vəkilləri Tennessi qubernatoru Bill Liyə əfv müraciəti edərək cəzanın ömürlük həbslə əvəz olunmasını istəyiblər. Müdafiə tərəfi onun uşaqlıqda fiziki və cinsi zorakılığa məruz qaldığını, psixi pozuntu diaqnozu qoyulduğunu və cinayət törədilən vaxt beyninin inkişafının tam başa çatmadığını vurğulayır. Həmçinin, ilkin məhkəmədə vəkilin yüngülləşdirici halları təqdim etmədiyi və edamın kişilər üçün nəzərdə tutulan həbsxanada kişi heyəti tərəfindən icrasının ona əlavə psixoloji iztirab verəcəyi bildirilir.