600-dən çox bal toplayıb kənarda qalanlara DİM sədrindən ŞAD XƏBƏR

Dövlət İmtahan Mərkəzinin (DİM) İdarə Heyətinin sədri Məleykə Abbaszadə IV ixtisas qrupu üzrə yüksək bal toplayaraq mülki ixtisaslara qəbul oluna bilməyən abituriyentlər üçün yeni imkanların yaradıldığını elan edib.

hadiseler.info xəbər verir ki, DİM sədri sosial şəbəkə hesabında müvafiq hərbi qurumla aparılan müzakirələr nəticəsində hərbi tibb və hərbi mühəndislik istiqamətlərində əlavə yerlərin ayrıldığını bildirib:

 Hərbi tibb: IV qrup üzrə yüksək nəticə göstərən və müəyyən olunmuş tələblərə (o cümlədən tibbi müayinəyə) cavab verən abituriyentlər müvafiq yerlər üçün müraciət edə biləcəklər.

 Hərbi mühəndislik: IV ixtisas qrupu üzrə imtahanda 450 və daha yüksək bal toplamış namizədlər hərbi mühəndislik ixtisasları üzrə qalan yerlərə müraciət etmək hüququ əldə ediblər.

Məleykə Abbaszadə vurğulayıb ki, bu addım keçirilmiş müsabiqənin nəticələrini dəyişdirmir, sadəcə yaranmış əlavə yerlər barədə bütün potensial namizədlərə bərabər imkan təqdim edir.