Qvineya Fransanın məşhur telekanalının yayımını dayandırdı

Qvineyada Fransa dövlət telekanalı olan “France 24″ün ölkə ərazisindəki fəaliyyətinə və yayımına son qoyulub.

hadiseler.info xarici mediaya istinadən xəbər verir ki, Qərbi Afrika ölkəsinin rəhbərliyi telekanalı tabesizlikdə və Prezident Mamadi Dumbuyanın ünvanına təhqiramiz ifadələr işlətməkdə təqsirləndirib.

Məlumata görə, Qvineyanın Kommunikasiya üzrə Ali Şurası telekanalın yayım lisenziyasını, eləcə də onun müxbirlərinin və xüsusi nümayəndələrinin akkreditasiyalarını ləğv edib. Qadağa kabel və peyk televiziyalarını, mobil tətbiqləri, veb-saytları və sosial şəbəkələri əhatə edir. “Canal+ Guinea” şirkətinə bu kanalı paketlərindən çıxarmaq tapşırılıb, Poçt və Telekommunikasiya Fəaliyyətinin Tənzimlənməsi İdarəsinə isə “France 24″ə aparan bütün rəqəmsal giriş nöqtələrini texniki olaraq bloklamaq göstərişi verilib.

Sərt qərara telekanal aparıcısının Prezident Dumbuyanı “qiyamçı lider” adlandırması səbəb olub. Tənzimləyici qurum bu ifadənin dövlət başçısının ləyaqətini alçaldacağını bildirərək xəbərin silinməsini və təkzib verilməsini tələb etsə də, telekanal buna əməl etməyib. Nəticədə qurum bu addımı ölkənin hüquqi suverenliyinin pozulması kimi qiymətləndirib. Həmçinin peşə etikasını pozması əsas gətirilərək “Jeune Afrique” jurnalının qvineyalı müxbiri Mamadu Diavo Barrinin də akkreditasiyası ləğv olunub.