Türkiyədə məktəb önündə silahlı hücum: Yaralıların sayısı 11-ə çatdı, dərslər dayandırıldı

Türkiyənin Manisa vilayətinin Turqutlu rayonunda lisey qarşısında baş verən silahlı insidentlə bağlı yeni təfərrüatlar bəlli olub.

hadiseler.info NTV-yə istinadən xəbər verir ki, Niyazi Üzmez Anadolu Texniki Liseyinin önündə törədilən silahlı hücum nəticəsində yaralananların sayısı 11-ə çatıb. Yaralanan şagirdlərdən ikisinin vəziyyəti ağırdır.

Aparılan əməliyyat-axtarış tədbirləri nəticəsində 9-cu sinif şagirdi olduğu bildirilən şübhəli şəxs saxlanılıb. Həmçinin, hücum edən şəxsin anası, atası və babası da hüquq-mühafizə orqanları tərəfindən saxlanılıb. Baş verən hadisədən sonra şübhəlinin məktəb ərazisinə daxil olması və qaçması ilə bağlı video-görüntülər də yayılıb.

Məsələ ilə bağlı Türkiyə Milli Təhsil Nazirliyindən bildirilib ki, hadisəni araşdırmaq üçün üç nazirlik birgə fəaliyyət göstərir. Nazirliyin qərarına əsasən, hücumun baş verdiyi liseydə dərslər bu gün üçün dayandırılıb.