Tramp: “Paris tezliklə müsəlman şəhərinə çevriləcək”

ABŞ Prezidenti Donald Tramp Fransanın paytaxtı Parisin nəzarətsiz immiqrasiya axını səbəbindən tezliklə müsəlman şəhərinə çevriləcəyini bəyan edib.

hadiseler.info xəbər verir ki, Tramp Vaşinqtonda jurnalistlərə açıqlamasında Fransadakı mövcud vəziyyəti kəskin tənqid edib:

“Oraya dünyanın hər yerindən insanlar gəlirlər. Nəticədə, Paris yaxın vaxtlarda müsəlman şəhəri olacaq. Lakin tamamilə başqa bir şey planlaşdırılırdı”.

Fransa şəhərlərində baş verən son kütləvi iğtişaşları şərh edən Tramp gördüklərindən təəssüfləndiyini vurğulayıb. O, Fransa Prezidenti Emmanuel Makrona immiqrantlar üçün ölkəyə giriş qaydalarını sərtləşdirməyi dəfələrlə məsləhət gördüyünü xatırladıb: “Orada baş verənlərin səbəbi məktəblərlə bağlı problem və ya başqa bir şey deyil, məhz immiqrasiyadır”, – deyə o əlavə edib.

Qeyd edək ki, Fransada alıcılıq qabiliyyətinin düşməsi və yanacağın bahalaşmasına etiraz olaraq keçirilən aksiyalara təşkilatçıların məlumatına görə 800 min, DİN-in məlumatına görə isə 550 min insan qatılıb. Ölkə miqyasında baş verən toqquşmalar və talanlar fonunda 2 400 nəfər saxlanılıb.