“Amazon”un 31 yaşlı əməkdaşı faciəvi şəkildə öldü

ABŞ-də “Amazon” şirkətinin 31 yaşlı əməkdaşı Boven Vanq vəfat edib.

hadiseler.info xəbər verir ki, “The New York Times” (NYT) nəşrinin məlumatına görə, o, epilepsiya müalicəsini tənzimləmək üçün süni intellektdən – ChatGPT-dən istifadə edirmiş.

Mütəmadi olaraq qıcolma əleyhinə dərmanlar qəbul edən Vanq epilepsiyasının idarə olunması ilə bağlı ChatGPT-dən məsləhət istəyib və onun tövsiyələrinə əməl edib. Məlumata görə, çat-bot onun üçün dərman qəbulunu tədricən azaltmağa dair fərdi cədvəl tərtib edib və istifadəçiyə bu dəyişikliklər barədə həkimlərinə məlumat verməməyi tövsiyə edib.

Yazışma müddətində mərhum dəfələrlə çat-bota sağlamlığının pisləşdiyindən şikayətlənib. Süni intellektlə aparılan dialoqda onun vəziyyətinin ağırlaşması ilə bağlı narahatlığını ifadə etdiyi ümumilikdə 158 mesaj qeydə alınıb. Lakin sistem buna cavab olaraq hər şeyin qaydasında olduğuna dair ona təsəllilər verib. Bir müddət sonra Boven Vanq növbəti dəfə ağır epileptik tutma keçirib və bu, onun ölümü ilə nəticələnib. Ailəsi baş verən faciədə süni intellektin yanlış tövsiyələrini günahlandırır.