“Əl-Nəsr” mövsümə Kriştianu Ronaldosuz başlayacaq

Portuqaliyalı ulduz Kriştianu Ronaldo 2026/2027 mövsümünün startında Səudiyyə Ərəbistanının “Əl-Nəsr” klubunun heyətində yer almayacaq. Hadisələr.info xəbər verir ki, bu barədə Səudiyyə Ərəbistanının “Əl-Yaum” qəzeti məlumat yayıb.

Bildirilib ki, Ronaldo yeni mövsümün ilk iki oyununu buraxacaq. 41 yaşlı futbolçu Roşn Liqasının ilk turunda “Əl-Fateh”ə, daha sonra isə Kral Kubokunun 1/32 final mərhələsində “Əl-Diriyah”a qarşı keçiriləcək görüşlərdə meydana çıxmayacaq. “Əl-Nəsr” avqustun 15-də liqanın ilk turunda “Əl-Fateh”lə, üç gün sonra isə Kral Kubokunda “Əl-Diriyah”la üz-üzə gələcək.

Çünki portuqaliyalı ulduzun uzun müddətdir komandadan ayrı qalması idman ictimaiyyətinin diqqətini çəkir. Həmçinin Portuqaliya millisinin 2026-cı il dünya çempionatının 1/8 finalında İspaniyaya 1:0 hesabı ilə məğlub olaraq turnirdən kənar qalmasından sonra futbolçu iyulun 6-dan etibarən “Əl-Nəsr”in düşərgəsində görünməyib.

Məlumatda qeyd olunur ki, Ronaldo dünya çempionatından sonra nəzərdə tutulan 21 günlük istirahət müddətinin ardından komandaya qayıtmalı idi.

Lakin onun məşqlərə qoşulmadığı və ötən həftə başa çatan xarici təlim-məşq toplanışında da iştirak etmədiyi vurğulanır.