Azərbaycanda 9 nəfərdə qarayara aşkarlandı: Qurumlardan BİRGƏ MƏLUMAT

Səhiyyə Nazirliyi, Azərbaycan Qida Təhlükəsizliyi Agentliyi (AQTA) və TƏBİB Samux rayonunda qeydə alınan qarayara hadisəsi ilə bağlı birgə məlumat yayıb.

hadiseler.info xəbər verir ki, ilkin epidemioloji araşdırmalar zamanı xəstəliyə şübhəli bilinən şəxslərin iribuynuzlu heyvanlarla təmasda olduğu müəyyən edilib.

İlkin şəxsdən götürülmüş nümunənin laborator müayinəsi nəticəsində “qarayara” diaqnozu təsdiqlənib. Xəstə heyvanla təmasda olmuş və əsasən Samux rayon sakini olan 9 nəfər Abbas Səhhət adına Gəncə Şəhər Birləşmiş Xəstəxanasının Yoluxucu Xəstəliklər şöbəsində izolyasiya edilib. Analizlər Şəmkir Regional Xüsusi Təhlükəli İnfeksiyalara Nəzarət Mərkəzinə göndərilib.

Rəsmi məlumatda bildirilir ki, qarayara zoonoz xəstəlikdir və insandan-insana keçməsi olduqca nadirdir. Həmçinin yaxşı termiki emal olunmuş ətin istehlakı yoluxmaya səbəb olmur. Hazırda vəziyyət tam nəzarətdədir, kütləvi yayılma halları yoxdur.