Çində güclü yağışlar torpaq sürüşməsinə səbəb oldu — Ölənlər var

Çinin şərqində yerləşən Çjetszyan (Zhejiang) əyalətində aramsız yağan güclü yağışlar dağıdıcı torpaq sürüşməsinə yol açıb.

hadiseler.info xəbər verir ki, təbii fəlakət Çanşin (Changxing) şəhərində ağır nəticələrə səbəb olub. Sürüşmə zamanı yaşayış evinin uçması nəticəsində 1 nəfər həlak olub, 3 nəfər isə uçunntular altında qalaraq itkin düşüb. Hazırda fəlakət zonasında təxirəsalınmaz axtarış-xilasetmə əməliyyatları davam etdirilir.

Çin Fövqəladə Hallar Nazirliyinin açıqladığı rəsmi hesabatda bildirilir ki, yalnız iyul ayı ərzində ölkədə tüğyan edən tayfunlar və təbii fəlakətlər səbəbindən 318 nəfər həyatını itirib və ya itkin düşüb. Təbii fəlakətlərin vurduğu birbaşa iqtisadi ziyan isə 8,5 milyard dolları ötüb. Meteoroloqlar regionda leysan yağışların həftəsonuna qədər aramsız davam edəcəyi ilə bağlı xəbərdarlıq ediblər.