Tovuzda üç uşaq anası itkin düşüb: Polis 26 yaşlı qadını axtarır-FOTO

Tovuz rayonunda 26 yaşlı, üç uşaq anası Lamiyə Cəlilova (Məmmədova) avqustun 6-da yaşadığı evdən çıxaraq bir daha geri qayıtmayıb.

hadiseler.info xəbər verir ki, yaxınlarının verdiyi məlumata görə, L.Cəlilova bir müddət əvvəl Qazıqulu kəndində yerləşən ata evinə gəlib və sonuncu dəfə məhz burada görünüb. Bundan sonra onunla əlaqə saxlamaq mümkün olmayıb. Qadının yoxluğunu fərq edən ailə üzvləri dərhal Daxili İşlər Nazirliyinin “102” Zəng Mərkəzinə və polisə məlumat veriblər.

Valideynləri bildiriblər ki, Lamiyənin ər evində yoldaşı ilə müəyyən narazılıqları olub və son vaxtlar psixoloji gərginlik keçirərək tez-tez ağlayırmış. O, avqustun 6-sı səhər saatlarında övladları yatarkən sənədlərini də götürərək evi sakitcə tərk edib.

Hazırda Lamiyə Cəlilovanın tapılması istiqamətində Tovuz Rayon Polis Şöbəsi tərəfindən genişmiqyaslı axtarış tədbirləri davam etdirilir. Ailə üzvləri onu görən və ya yerini bilən şəxslərdən dərhal hüquq-mühafizə orqanlarına məlumat vermələrini xahiş edirlər.