İran müdafiədən hücum siyasətinə keçir

İran müharibənin tam şəkildə dayandırılması istiqamətində Birləşmiş Ştatlar ilə aparılan danışıqlarda irəliləyiş əldə olunmadığı üçün siyasi kursunu müdafiədən hücum taktikasınadək dəyişmək qərarı verib.

hadiseler.info “Reuters” agentliyinə istinadən xəbər verir ki, bu barədə yüksək vəzifəli İran rəsmisi məlumat verib.

Rəsminin bildirdiyinə görə, hərbi əməliyyatların yekunlaşması və strateji baxımdan mühüm önəm daşıyan Hörmüz boğazında neft tankerlərinin təhlükəsiz hərəkətinin bərpasına dair müzakirələr tamamilə dalana dirənib. Hazırkı mərhələdə toqquşmaların yaxın zamanlarda səngiyəcəyinə dair heç bir real göstərici yoxdur.

Mənbə qeyd edib ki, ölkənin aidiyyəti strukturları Hörmüz boğazında və Yaxın Şərq regionunda gərginliyin kritik həddə çatmasına hazır olmalıdırlar. O vurğulayıb ki, diplomatik cəhdlər nəticə verməzsə, Tehran ABŞ-nin tətbiq etdiyi hərbi-dəniz blokadasını yarmaq məqsədilə adekvat və hədəfəyönlü hərbi zərbələr endirmək variantını nəzərdən keçirir.

Qeyd edək ki, avqustun 17-si (bazar ertəsi) tərəflərin iyunun 17-də imzaladığı anlaşma memorandumu çərçivəsində yekun sülh sazişinə gəlməli olduqları son müddət kimi müəyyənləşdirilmişdi.