Sivasda sərnişin mikroavtobusu dərəyə aşıb: 4 ölü, 10 yaralı

Türkiyənin Sivas vilayətinin Suşehri rayonunda sərnişin mikroavtobusunun dərəyə aşması nəticəsində ağır yol-nəqliyyat hadisəsi baş verib.

hadiseler.info Anadolu Agentliyinə (AA) istinadən xəbər verir ki, Hayati Arasın idarə etdiyi 58 SG 604 dövlət qeydiyyat nişanlı sərnişin mikroavtobusu Sivas-Suşehri avtomobil yolunun Gemin Dərəsi, Çokrak kəndi ərazisində idarəetmədən çıxaraq dərəyə aşıb.

Hadisə barədə məlumat daxil olan kimi əraziyə dərhal jandarma, AFAD və təcili tibbi yardım briqadaları cəlb olunub.

Dəhşətli qəza nəticəsində 4 nəfər həyatını itirib, 4-nün vəziyyəti ağır olmaqla ümumilikdə 10 nəfər müxtəlif dərəcəli xəsarətlər alıb. Yaralılar təcili yardım maşınları ilə yaxınlıqdakı xəstəxanalara çatdırılıb.

Faktla bağlı araşdırma aparılır.