İsmayıllıda toyda kütləvi zəhərlənmə baş verib

hadiseler.info Azərbaycan Qida Təhlükəsizliyi Agentliyinə istinadən xəbər verir ki, İsmayıllı rayonunun Hacıhətəmli kəndində həyətyanı sahədə təşkil olunan toy məclisində qida zəhərlənməsi qeydə alınıb. Hadisə ilə bağlı müvafiq qurumların əməkdaşları birgə araşdırmalara başlayıb.

Zəhərlənmə şübhəsi ilə 24 nəfər Göyçay Rayon Mərkəzi Xəstəxanasına müraciət edib. Tibbi yardım göstərildikdən sonra vəziyyəti yaxşılaşan şəxslər evə buraxılıblar. Agentliyin mütəxəssisləri tərəfindən qidalardan nümunələr götürülərək laborator müayinəyə cəlb olunub.

Qida Təhlükəsizliyi Agentliyi xüsusilə yay mövsümündə kütləvi tədbirlər zamanı yeməklərin saxlanma şəraitinə və temperatur rejiminə ciddi əməl edilməsinin vacibliyini xatırladır.