İlham Əliyev: Daşkənd və bütövlükdə Özbəkistan yüksəliş dövrünü yaşayır

Azərbaycan Prezidenti İlham Əliyev Özbəkistana hər səfəri zamanı ölkənin sürətli inkişafının şahidi olduğunu bildirib.

hadiseler.info xəbər verir ki, dövlət başçısı bu fikirləri Özbəkistan Prezidenti Şavkat Mirziyoyev ilə mətbuata birgə bəyanatında səsləndirib.

Prezident İlham Əliyev göstərilən qonaqpərvərliyə görə təşəkkür edərək Özbəkistanın əldə etdiyi uğurları xüsusi vurğulayıb:

“İlk növbədə, dəvətə, qonaqpərvərliyə, Azərbaycana və Azərbaycan xalqına göstərdiyiniz səmimi münasibətə görə sizə bir daha təşəkkürümü bildirmək istərdim. Daşkəndə ilk dəfə səfər etmirəm və hər dəfə burada olarkən sürətli inkişafın şahidi oluram. Bu gün Daşkənd və bütövlükdə Özbəkistan yüksəliş mərhələsindədir. Bu isə mənim əziz qardaşım Şavkat Mirziyoyevin Özbəkistanın potensialının gücləndirilməsinə, ölkənin beynəlxalq arenadakı mövqelərinin möhkəmləndirilməsinə və ən mühüm sosial-iqtisadi məsələlərin həllinə yönəlmiş fəaliyyətinin nəticəsidir”

Dövlətimizin başçısı iki ölkə arasında iqtisadi əlaqələrin yeni səviyyəyə qalxdığını və hədəflərin böyüdüyünü diqqətə çatdırıb:

“Şavkat Mirziyoyev Özbəkistana rəhbər gəlməzdən əvvəl ölkələrimiz arasında heç bir birgə layihə yox idi. Bu gün isə biz 1 milyard dollarlıq əmtəə dövriyyəsi hədəfindən hansısa uzaq gələcək arzusu kimi deyil, yəqin ki, bir neçə ildən sonra çatacağımız göstərici kimi danışırıq. Bu gün müzakirə olunan investisiya layihələri və qarşılıqlı təşəbbüslər hər iki ölkə paralel inkişaf yolu ilə irəliləməsəydi mümkün olmazdı”