Aİ-yə Rusiyanın dondurulmuş aktivləri ilə bağlı prosesləri bərpa etmək çağırışı edildi

Avropa İttifaqının (Aİ) dörd ölkəsi – İsveç, Niderland, Polşa və İspaniya Avropa Komissiyasına (AK) məktub ünvanlayaraq Ukraynaya dəstək məqsədilə Rusiyanın dondurulmuş suveren aktivlərindən istifadə mexanizminin bərpasını tələb ediblər.

hadiseler.info xəbər verir ki, müraciət müəllifləri Ukraynanın maraqları üçün bloklanmış aktivlərdən istifadə üzrə yeni hüquqi və maliyyə variantlarının öyrənilməsini təklif edirlər. Qeyd olunur ki, ortaya çıxan risklər bir və ya bir neçə dövlətin üzərinə düşməməli, bütün Aİ ölkələri arasında bərabər bölüşdürülməlidir.

Avropa Komissiyasının rəsmi nümayəndəsi Balaş Ujvari sənədi hələlik almadıqlarını, lakin Rusiya aktivlərindən potensial reparasiya kreditinin istifadəsi məsələsinin gündəmdə olduğunu bildirib. AK-nın mətbuat xidmətinin rəhbəri Paula Pinyo isə əlavə edib ki, dörd ölkənin yeni müraciətindən sonra mövzu yenidən siyasi müstəviyə qayıda bilər.