Bu ünvanlardakı binalar sökülə bilər

Bakının Binəqədi rayonunun Biləcəri qəsəbəsində qəzalı vəziyyətdə olan bir neçə yaşayış binasının sökülməsi gündəmə gəlib.

hadiseler.info Baku.ws-ə istinadən xəbər verir ki, A. Zeynallı küçəsi 35 ünvanındakı 1A saylı, A. Zeynallı küçəsi 37 ünvanındakı 2A və 4A saylı, eləcə də M. S. Ordubadi küçəsi 15 ünvanındakı 3 saylı binaların sökülməsi nəzərdən keçirilir. Binaların qəzalı vəziyyətdə olması onların gələcəkdə söküntü proqramına daxil edilməsini zəruri edir.

Məsələ ilə bağlı Binəqədi Rayon İcra Hakimiyyətindən bildirilib ki, sözügedən ərazi üzrə müvafiq investisiya təklifləri daxil olduğu və investorlar tərəfindən maraq göstərildiyi təqdirdə söküntü məsələsinə baxıla bilər. Qeyd olunub ki, hazırda həmin ərazidə dövlət tərəfindən söküntü işlərinin aparılması nəzərdə tutulmur.

Əgər söküntü həyata keçirilərsə, sakinlərin mənzil təminatı məsələsi ayrıca müəyyənləşdiriləcək. Məlumat üçün bildirək ki, əvvəlki illərdə kvadratmetr üçün təxminən 1500 manat civarındakı kompensasiya ödənişləri hazırda Bakı üzrə orta hesabla 2700 manat təşkil edir.