İŞİD-in tərkibində döyüşən azərbaycanlıya hökm oxunub

Suriyada İŞİD terror təşkilatının tərkibində döyüş əməliyyatlarında iştirak etməkdə təqsirləndirilən Nicat Əzizov 8 il 6 ay müddətinə azadlıqdan məhrum edilib.

hadiseler.info “Report”a istinadən xəbər verir ki, hökm Bakı Ağır Cinayətlər Məhkəməsində keçirilən məhkəmə prosesində elan olunub.

Hökmə əsasən, Nicat Əzizov cəzasını ümumi rejimli cəzaçəkmə müəssisəsində çəkəcək.

Qeyd edək ki, Nicat Əzizov 2025-ci ilin dekabrında Dövlət Təhlükəsizliyi Xidməti (DTX) tərəfindən saxlanılıb.

İttihama görə, o, dini düşmənçilik, radikalizm və fanatizm zəminində Suriyada silahlı münaqişələrdə iştirak etmək məqsədilə Bakıdan Türkiyənin İstanbul şəhərinə, daha sonra isə Hatay istiqamətindən qanunsuz yollarla Suriyaya keçib.

Nicat Əzizovun Suriyanın Hələb, Azaz və Əl-Bab şəhərlərində İŞİD-in tərkibində fəaliyyət göstərən, digər Azərbaycan vətəndaşının rəhbərlik etdiyi “Xalidin camaatı” adlı silahlı qrupun tərkibində döyüşlərdə iştirak etdiyi bildirilib.

İttihamda qeyd olunub ki, o, Azərbaycan hüdudlarından kənarda törətdiyi və həm Azərbaycan, həm də Suriya qanunvericiliyinə əsasən cinayət hesab olunan əməllərə görə Suriyada məhkum edilməyib.

Nicat Əzizov Cinayət Məcəlləsinin 12.1, 218.2 və 283-1.3-cü maddələri ilə təqsirli bilinib.