Uitkoff və Kuşner Moskvaya səfər ediblər

ABŞ Prezidenti Donald Trampın Ukrayna münaqişəsinin nizamlanması üzrə xüsusi elçiləri Stiv Uitkoff və Cared Kuşner Moskvaya səfər ediblər.  

hadiseler.info “İnterfaks”a istinadən xəbər verir ki, ABŞ nümayəndə heyətini daşıyan biznes-jet Moskvanın “Vnukovo” hava limanına eniş edib.

Səfərin əsas məqsədi Ukraynadakı münaqişənin dinc yolla həlli və mümkün sülh sazişi üzrə yeni təkliflərin müzakirəsidir. ABŞ Prezidenti Donald Tramp Vaşinqtonun münaqişənin nizamlanması ilə bağlı yeni ideya hazırladığını və xüsusi elçilərini bu səbəbdən danışıqlara göndərdiyini açıqlayıb. Səfər çərçivəsində nümayəndələrin həm Moskvada, həm də Kiyevdə görüşlər keçirəcəyi planlaşdırılır.  

Qeyd edək ki, Uitkoff və Kuşner sonuncu dəfə yanvar ayında Moskvaya səfər edərək Rusiya Prezidenti Vladimir Putinlə danışıqlar aparmışdılar.