ABŞ-də ailə münaqişəsi faciə ilə bitdi: 4-ü uşaq olmaqla 8 nəfər həlak olub-VİDEO-FOTO

ABŞ-nin Montana ştatının Billinqs şəhərində yaşayış evində baş verən silahlı insident və ardınca başlayan yanğın nəticəsində 8 nəfər həyatını itirib.

hadiseler.info xəbər verir ki, “ABC News” tərəfindən yayılan məlumata görə, hüquq-mühafizə orqanlarına evdə atışma olması barədə çağırış daxil olub. Hadisə yerinə gələn polis əməkdaşları atəş səsləri eşidib və evin alovlandığını müşahidə ediblər.

Yellouston dairəsinin şerifi Kent O’Donnell hadisənin ilkin olaraq ailə münaqişəsi zəminində baş verdiyini bildirib. İlkin ehtimallara əsasən, yanğın nəticəsində evdə 4 böyük və 4 uşaq həlak olub. Qurbanların kimliyi və yaş həddi hələlik açıqlanmayıb, yanğın səbəbindən onların qalıqlarının çıxarılması istiqamətində işlər aparılır.

Cinayətlə əlaqəli olduğu ehtimal edilən şübhəli şəxs də ölüb. Polisin evin həyətində aşkarladığı və özünə güllə yarası yetirdiyi düşünülən kişi xəstəxanaya çatdırılsa da, onun həyatını xilas etmək mümkün olmayıb.

Polis hadisə ilə bağlı başqa şübhəlinin axtarılmadığını və ictimaiyyət üçün hər hansı təhlükənin qalmadığını bəyan edib.