Adil Kərimli Migel Anxel Moratinos ilə görüşüb

Azərbaycanın mədəniyyət naziri Adil Kərimli ölkəmizdə səfərdə olan BMT-nin Sivilizasiyalar Alyansının (UNAOC) ali nümayəndəsi Migel Anxel Moratinos və qurumun direktoru Nihal Saad ilə görüş keçirib.

hadiseler.info xəbər verir ki, görüş zamanı nazir oktyabrın 27–29-da Bakıda keçiriləcək VII Ümumdünya Mədəniyyətlərarası Dialoq Forumunun “Ortaq gələcək naminə dialoq: parçalanmış dünyada körpülərin qurulması” mövzusuna həsr olunduğunu bildirib. Adil Kərimli builki Forumun qlobal platformanın 2011-ci ildəki ilk toplantısının 15 illiyinə təsadüf etdiyini diqqətə çatdırıb, Prezident İlham Əliyevin rəhbərliyi ilə Azərbaycanın beynəlxalq miqyasda etibarlı dialoq məkanı kimi tanındığını vurğulayıb.

BMT-nin ali nümayəndəsi Migel Anxel Moratinos və direktor Nihal Saad qəbula görə təşəkkür edərək, Prezident İlham Əliyevin təşəbbüsü ilə həyata keçirilən “Bakı Prosesi” platformasının əhəmiyyətinin ildən-ilə artdığını qeyd ediblər. Qurumun Azərbaycanla əməkdaşlığından məmnunluq ifadə olunub.

Görüşdə beynəlxalq münasibətlər sisteminin və düzənin bərpasında mədəniyyət diplomatiyasının rolu müzakirə edilib, bu istiqamətdə əməkdaşlığın daha da genişləndirilməsinin vacibliyi vurğulanıb.