Bakıda tanınmış restoran BAĞLANDI – VİDEO

Bakıda fəaliyyət göstərən məşhur iaşə obyektlərindən biri – “El Pizza” restoranı yanğın təhlükəsizliyi qaydalarını kobud şəkildə pozduğuna görə bağlanıb.

hadiseler.info xəbər verir ki, bu barədə Fövqəladə Hallar Nazirliyi (FHN) məlumat yayıb. Yasamal rayonu, Akademik Şəfaət Mehdiyev küçəsi, ev 23 ünvanında, yaşayış binasının birinci mərtəbəsində yerləşən restoranda aparılan yoxlamalar zamanı ciddi təhlükələr aşkarlanıb.

FHN-in açıqlamasına görə, obyektdə aşağıdakı qanun pozuntuları müəyyən edilib:

 Restoranın mətbəxində yanğın təhlükəsizliyi tələblərinə zidd olaraq təbii qaz təsərrüfatından istifadə edilir.

 Obyektdə standarta uyğun olmayan odun sobaları işlədilir.

 Mövcud odsöndürən balonlar normativlərə uyğun olaraq döşəmə səviyyəsindən 1.5 metr hündürlükdə yerləşdirilməyib.

 Yanğın zamanı insanların təxliyə olunması üçün köçürmə planı tərtib olunmayıb.

 Obyektdə yanğın təhlükəsizliyinin təmin edilməsi məqsədilə əmrlə müvafiq rejim müəyyənləşdirilməyib.

 Obyektin daşınmaz əmlakının icbari sığorta şəhadətnaməsi təqdim edilməyib.

Mütəxəssislər bildirirlər ki, mövcud vəziyyət obyektin istismarının davam etdirilməsi halında hər an baş verə biləcək yanğının qısa müddətdə genişlənərək faciəyə səbəb ola biləcəyini göstərir. Qeyd olunanları nəzərə alaraq, “El Pizza” restoranının fəaliyyətinin dayandırılması barədə Qərar qəbul olunub və sənədin bir nüsxəsi obyektin nümayəndəsinə təqdim edilib.