Ağdaşda parkda attraksion aşdı, iki yeniyetmə yaralandı-VİDEO

Ağdaş rayonundakı istirahət parkında attraksionun qəzaya uğraması nəticəsində iki yeniyetmə xəsarət alıb.

hadiseler.info xəbər verir ki, hadisə avqustun 19-da baş verib.

Zərərçəkən yeniyetmələrin anası İlahə Baxışovanın bildirdiyinə görə, Bakıdan Ağdaşa qonaq gedən ailə uşaqları əylənmək üçün parka aparıb. Həmin vaxt relsdən çıxan attraksion qatarı aşıb və 16 yaşlı qız onun altında qalıb. Qəza nəticəsində qız ağır xəsarətlər alıb, qardaşının isə omba sümüyü çıxıb.

Valideynin sözlərinə görə, parkdakı cavabdeh şəxslər hadisənin böyüməməsi üçün şikayət etməməyi xahiş etsələr də, uşaqların vəziyyəti ağırlaşdığından xəstəxanaya müraciət olunub. Attraksion sahibi isə zərərçəkənlərə hər hansı köməklik göstərməkdən imtina edib.

Məsələ ilə bağlı vətəndaşın müraciəti əsasında ərazi üzrə polis orqanında araşdırma aparılır.