Avqustun 15-dən 6 yeni ekspres avtobus marşrutu istifadəyə verilir – İSTİQAMƏTLƏR

Hadisələr.info xəbər verir ki, bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) məlumat yayıb.

Məlumata görə, “Bakı Metropoliteni” QSC-nin xətlərin ayrılması layihəsi çərçivəsində “28 May” və “Nizami” stansiyaları arasında qatarların hərəkəti təmir-inşaat işləri yekunlaşana qədər müvəqqəti dayandırılacaq.

Qeyd olunan stansiyalar arasında doğrudan metro əlaqəsinin kəsilməsi ilə bağlı sərnişinlərin yaşayacağı sıxlığı və çətinlikləri aradan qaldırmaq üçün yerüstü nəqliyyatda dəstəkləyici tədbirlərin görülməsinə qərar verilib. Bu çərçivədə AYNA 6 yeni ekspres avtobus marşrutunu istismara verəcək, həmçinin bəzi mövcud xətlərdə avtobusların sayını artıracaq.

Ekspres avtobuslar metronun iş rejiminə uyğun olaraq hər gün saat 06:00-dan 00:00-dək fəaliyyət göstərəcək.

Yeni fəaliyyətə başlayacaq ekspres xətlər bunlardır:

 M1: “Elmlər Akademiyası” m/s – “28 May” m/s

 M2: “İnşaatçılar” m/s – “Nizami” m/s – “28 May” m/s

 M3: “20 Yanvar” m/s – “Nizami” m/s – “28 May” m/s

 M4: “20 Yanvar” m/s – “Koroğlu” m/s

 M5: “20 Yanvar” m/s – “Gənclik” m/s

 M6: “Elmlər Akademiyası” m/s – “Gənclik” m/s

Bununla yanaşı, 2, 6, 7A, 9, 10, 14, 17, 18, 26, 61, 65, 79, 85, 88, 88A, 93, 133, 165, 199 və 202 nömrəli avtobus xətlərində nəqliyyat vasitələrinin sayı artırılacaq, hərəkət intervalları isə azaldılacaq. Metro məhdudiyyəti dövründə tələbatın artacağı digər marşrutlara da əlavə avtobusların cəlb edilməsi planlaşdırılır.

Vətəndaşlar alternativ nəqliyyat variantları haqqında məlumatları “AYNA MaaS” mobil tətbiqi vasitəsilə izləyə bilərlər.

Məhdudiyyət dövründə sərnişinlərə istiqamət vermək və köməklik göstərmək məqsədilə metronun “28 May”, “20 Yanvar”, “İnşaatçılar” və “Elmlər Akademiyası” stansiyalarının çıxışlarında könüllülər fəaliyyət göstərəcək.