Azərbaycanda ilk dəfə kriptovalyuta dövlət nəfinə müsadirə olundu

Dövlət Təhlükəsizliyi Xidməti (DTX) tərəfindən həbs edilmiş B.H.R. və İ.R.F. barəsində yürütülən cinayət işi üzrə məhkəmə prosesi yekunlaşıb.

hadiseler.info xəbər verir ki, məhkəmə təcrübəsində ilk dəfə olaraq kriptovalyutanın dövlət nəfinə müsadirə edilməsi haqqında qərar çıxarılıb.

Yasamal Rayon Məhkəməsinin hökmü ilə xüsusilə külli miqdarda pul vəsaitlərinin ölkədən qanunsuz çıxarılması və gizli köçürülməsinin təşkilində təqsirli bilinən B.H.R. 3,6 milyon manat, İ.R.F. isə 31,3 milyon manatdan çox cərimə olunmaqla azadlığın məhdudlaşdırılması cəzasına məhkum ediliblər.

Həmçinin ibtidai istintaq zamanı “Binance” birjasında həbs qoyulmuş hesabdakı 830 ədəd kriptovalyutanın müsadirə edilərək dövlət nəfinə keçirilməsi təmin olunub. Müsadirə mexanizmi həm ölkə, həm də qlobal miqyasda hüquqi baxımdan yeni təcrübə hesab olunur.