Azərbaycanlı futbolçunu öldürən erməni döyüşçü HƏBS OLUNDU

Rusiyanın Yekaterinburq şəhərində azərbaycanlı futbolçu Emil Hüseynovu qətlə yetirdiyinə görə cəza çəkmiş keçmiş qaydasız döyüş ustası Tiqran Çiçakyan yenidən cinayət işinə cəlb olunub.

hadiseler.info xəbər verir ki, bu barədə “e1.ru” portalı məlumat yayıb.

Məlumata görə, 30 yaşlı Tiqran Çiçakyan avqustun 7-də saxlanılıb. O, 33 yaşlı digər bir şəxslə birlikdə tamah məqsədilə və zor tətbiq etməklə qabaqcadan əlbir olan bir qrup şəxs tərəfindən adam oğurluğunda ittiham olunur (Rusiya Federasiyası Cinayət Məcəlləsinin 126-cı maddəsinin 2-ci hissəsi). Kamensk-Uralsk şəhərinin Sinarsk Rayon Məhkəməsinin qərarı ilə hər iki şübhəli barəsində həbs qətimkan tədbiri seçilərək istintaq təcridxanasına göndərilib.

Xatırladaq ki, Tiqran Çiçakyan 2015-ci il aprelin 19-da Yekaterinburqdakı “U Saşi” kafesində düşən kütləvi dava zamanı keçmiş “Neftçi”, “Karvan” və “Abşeron” klublarının futbolçusu Emil Hüseynovun sinəsinə bıçaq zərbələri endirərək onu qətlə yetirmişdi. Bu cinayətə görə 2016-cı ildə 9 il müddətinə azadlıqdan məhrum edilən T.Çiçakyan yalnız 16 avqust 2024-cü ildə cəzaçəkmə müəssisəsindən buraxılmışdı.