AZAL növbəti yeni nəsil “Airbus A321neo” təyyarəsi ilə donanmasını genişləndirib

“AZCON Holding” şirkətlərindən olan Azərbaycan Hava Yolları (AZAL) donanmasına növbəti yeni nəsil “Airbus A321neo” təyyarəsini daxil edib. Bununla da aviaşirkətin donanmasındakı yeni nəsil təyyarələrin ümumi sayı 10-a (8 ədəd “Airbus A320neo” və 2 ədəd “Airbus A321neo”) çatıb.

hadiseler.info xəbər verir ki, bu barədə AZAL rəsmi məlumat yayıb.

Yeni “Airbus A321neo” təyyarəsi yüksək tələbat olan istiqamətlərdə daşıma imkanlarının genişləndirilməsinə və əməliyyat səmərəliliyinin artırılmasına töhfə verir. Bu tip modern hava gəmilərinin alışı uçuş proqramının planlaşdırılmasında çevikliyi artırır və sərnişin axınının mövsümi dəyişməsinə uyğunlaşmağa imkan yaradır.

Təyyarə müasir “Airspace” salon konsepsiyası, bortdaxili əyləncə sistemi və yüksək sürətli “Wi-Fi” xidməti ilə təchiz olunub. Yenilənmiş interyer, geniş əl yükü bölmələri və tənzimlənən işıqlandırma sərnişinlərin maksimum rahatlığını təmin edir. Əvvəlki nəsil modellərlə müqayisədə “Airbus A321neo” hər oturacaq üzrə təxminən 20 faiz daha az yanacaq sərfiyyatı və karbon emissiyası ilə seçilir.

Qeyd edək ki, Azərbaycan Hava Yolları ilk “Airbus A321neo” təyyarəsini 2026-cı ilin iyulunda qəbul edib. İkinci “A321neo”nun gəlişi ilə cari ildə donanmaya əlavə olunan yeni təyyarələrin sayı 5-ə çatıb və ilin sonunadək bu tipli daha 2 təyyarənin tədarükü nəzərdə tutulur.

Milli aviadaşıyıcı uzunmüddətli inkişaf proqramı çərçivəsində 2032-ci ilədək donanmasını 50 təyyarəyə çatdırmağı hədəfləyir.