Badamdarda mənzildə partlayış: 18 yaşlı gənc ağır xəsarət alıb

Bakının Səbail rayonu, Badamdar qəsəbəsində yerləşən beşmərtəbəli yaşayış binasında partlayış baş verib.

hadiseler.info xəbər verir ki, Fövqəladə Hallar Nazirliyinin “112” qaynar telefon xəttinə daxil olan məlumatla əlaqədar Dövlət Yanğından Mühafizə və Xüsusi Riskli Xilasetmə xidmətlərinin qüvvələri dərhal əraziyə cəlb olunub. Hadisə yerində aparılan ilkin qiymətləndirmə zamanı partlayışın binanın birinci mərtəbəsindəki mənzilin hamam otağında, qazla işləyən cihazda meydana gəldiyi müəyyən edilib. FHN əməkdaşları tərəfindən ərazidə təhlükəsizlik tədbirləri həyata keçirilib.

TƏBİB-dən verilən məlumata görə, hadisə nəticəsində 2006-cı il təvəllüdlü kişi cinsi olan şəxs ağır xəsarət alıb. Zərərçəkənə baş, boyun, gövdə, hər iki aşağı və yuxarı ətrafların II-III dərəcəli termiki alov yanığı diaqnozu qoyularaq təcili tibbi yardım briqadası tərəfindən Nərimanov Tibb Mərkəzinin nəzdindəki Yanıq Mərkəzinə hospitalizasiya olunub.

Pasiyentin müalicəsi hazırda Reanimasiya şöbəsində davam etdirilir, vəziyyəti ağır olaraq qiymətləndirilir.

Faktla bağlı aidiyyəti qurumlar tərəfindən geniş araşdırma aparılır.