Sosial şəbəkələrdə satılan arıqlama məhsullarında TƏHLÜKƏLİ MADDƏ tapıldı — FOTO  

Azərbaycan Respublikasının Qida Təhlükəsizliyi Agentliyi (AQTA) sosial şəbəkələrdə onlayn satışı həyata keçirilən arıqlama çayları, kofe, bioloji aktiv qida əlavələri və idman qidaları ilə bağlı növbəti monitorinqlər keçirib.  

hadiseler.info xəbər verir ki, “slimming.body.azerbaijan”, “korol_baku” İnstaqram və “fit_yasam_soutfit” TikTok hesabları üzərindən satılan məhsullarla bağlı araşdırmalar aparılıb.  

Laborator müayinələr zamanı “Slimming Body Max Hunger Buster”, “Korol Poxudeniya” və “Sout Fit Extra” adlı məhsulların tərkibində istifadəsi qadağan olunmuş təhlükəli sintetik dərman maddəsi — sibutramin aşkarlanıb. Sibutramin mərkəzi sinir sisteminə təsir edərək iştahanı azaldır və arterial təzyiqin yüksəlməsi, ürək ritminin pozulması, taxikardiya, infarkt, insult kimi ağır ürək-damar fəsadlarına yol açdığı üçün Azərbaycanda və bir çox ölkələrdə qadağan edilib.  

Araşdırma zamanı həmin məhsulların qeydiyyata alınmadığı, idxal sağlamlıq aktlarının olmadığı və ölkəyə qanunsuz yolla gətirildiyi müəyyən edilib. Sözügedən məhsulların sosial şəbəkələrdə tanınmış şəxslər tərəfindən reklam edildiyini bildirən AQTA xəbərdarlıq edir ki, məhsulun məşhurlar tərəfindən təbliğ olunması onun təhlükəsizliyinə zəmanət vermir.