Bağırsağında 100-dən çox heroin keçirməyə çalışan şəxs saxlanıldı- FOTO

İspaniyanın Palma-de-Malyorka şəhərinin hava limanında bağırsağında 1.3 kq-dan çox heroin daşıyan 46 yaşlı kişi ələ keçib.

hadiseler.info xəbər verir ki, “Bild”in məlumatına görə, sərnişin Belçikanın Şarlerua şəhərindən adaya uçub. Belçika hüquq-mühafizə orqanlarının xəbərdarlığı əsasında təyyarə enəndən sonra sərnişin gömrük, Mülki Qvardiya və polis əməkdaşları tərəfindən saxlanılıb.

Rentgen müayinəsi zamanı şübhəli şəxsin həzm sistemində çoxlu sayda kapsul aşkar edilib. Xəstəxanada həkimlərin nəzarəti altında onun orqanizmindən ümumi çəkisi 1.353 kq olan heroinlə dolu 109 paket çıxarılıb. Tibbi prosedurlar başa çatdıqdan sonra məhkəməyə çıxarılan şəxs barəsində araşdırma müddətində həbs qətimkan tədbiri seçilib.