Bakıda bıçaqlanma hadisəsi: Məhkəmə bir nəfər haqqında hökm çıxardı

Binəqədi Rayon Məhkəməsində xuliqanlıqda təqsirləndirilən Zamiq Xudiyevin (adı, soyadı şərtidir) cinayət işi üzrə məhkəmə istintaqı yekunlaşıb.

Hadisələr.info “Pravda.az”a istinadən xəbər verir ki, hakim Gültəkin Əsədovanın sədrliyi ilə keçirilən prosesdə elan olunan hökmə əsasən, Z.Xudiyev 2 il 11 ay 26 gün müddətinə azadlıqdan məhrum edilib. O, cəzasını ümumi rejimli cəzaçəkmə müəssisəsində çəkəcək.

İttiham aktına görə, olay 2025-ci ilin axşam saatlarında paytaxtın Binəqədi rayonunda, insanların sıx olduğu ərazidə qeydə alınıb. Təqsirləndirilən şəxs müstəntiqlər tərəfindən şəxsiyyəti hələ də müəyyənləşdirilməyən digər şəxslərlə birgə zərərçəkmiş Tağı Məmmədovu (adı, soyadı şərtidir) mühasirəyə alıblar. Yanındakılar zərərçəkənin qollarını tutaraq hərəkətsiz saxladıqları halda, Zamiq Xudiyev ona bıçaqla xəsarət yetirib.

Ekspertiza rəyinə əsasən, T.Məmmədovun sağ qalça nahiyəsində qarın boşluğuna nüfuz etməyən kəsilmiş-deşilmiş xəsarət aşkarlanıb. İctimai qaydanı kobud şəkildə pozaraq cəmiyyətə açıq-aşkar hörmətsizlik nümayiş etdirən Z.Xudiyevə Cinayət Məcəlləsinin 221.3-cü maddəsi ilə ittiham verilib. O, məhkəmədə özünü qismən təqsirli bildiyini ifadə edib.