Rusiya hərbi qüvvələri Qara dənizdə 3 yük gəmisinə zərbə endirib

Rusiya hərbi qüvvələri Qara dənizdə 3 yük gəmisinə zərbə endirib

Qara dəniz akvatoriyasında hərbi gərginlik artmaqda dəvam edir. Rusiya Silahlı Qüvvələri Ukrayna ordusuna müxtəlif təminat yükləri daşıdığı iddia edilən daha üç quru yük gəmisini hədəfə alaraq zərbələr endirib.

Hadisələr.info Rusiya Müdafiə Nazirliyinin rəsmi açıqlamasına istinadən xəbər verir ki, avqustun 6-sı axşam saatlarından 7-si səhərədək pilotsuz uçuş aparatları (PUA) vasitəsilə həyata keçirilən hücumlar zamanı Ukrayna Silahlı Qüvvələrinin maraqlarına xidmət edən gəmilər sıradan çıxarılıb.

Rusiya hərbi idarəsi bu cür əməliyyatların rəqib tərəfin silah, hərbi texnika və maddi-texniki resurslarla təminat zəncirini qırmağa yönəldiyini vurğulayıb. Açıqlamada qeyd olunur ki, strateji obyektlərə və nəqliyyat marşrutlarına endirilən bu zərbələr Ukrayna ordusunun döyüş qabiliyyətini kəskin şəkildə zəiflədir.

Öz növbəsində Ukrayna rəsmiləri Qara dəniz limanlarının blokadası səbəbindən ölkə iqtisadiyyatının, xüsusən də aqrar sektorun ağır zərbə aldığını bildirirlər. İyulun 22-dən Böyük Odessa limanlarına gəmilərin daxil olmasının dayanması ixrac və idxal zəncirini demək olar ki, iflic edib. Bu səbəbdən kənd təsərrüfatı sektorunun illik maliyyə itkisinin 1,5–3 milyard ABŞ dolları həcmində olacağı təxmin edilir.