Bakıda kirayə evlər niyə bahalaşır? – Tələbələrin mənzil problemi- EKSPERT AÇIQLADI

Yeni tədris ilinin başlaması ilə əlaqədar Bakıda kirayə mənzil bazarında kəskin qiymət artımı müşahid olunur. Xüsusilə ali təhsil müəssisələrinə qəbul olan və regionlardan paytaxta axın edən tələbələr mənzil tapmaqda ciddi çətinliklərlə qarşılaşırlar.

Hadisələr.info xəbər verir ki, paytaxtda kirayə mənzillərə tələbatın artması fonunda qiymətlərin kəskin yüksəlməsi tələbələrin və onların valideynlərinin maddi yükünü artırıb.

Ekspertlərdən xəbərdarlıq: Tələbat qiymətləri qaldırır

Əmlak eksperti Anar Nəsibov bildirib ki, qiymət artımı mənzilin təmirindən, yerləşdiyi binadan və xüsusən də məkandan asılı olaraq dəyişir. Tələbə axını dövründə xüsusilə Yasamal rayonu və “Elmlər Akademiyası” metrosu ətrafında mənzillərə tələb kəskin artır, bu da qiymətlərin yüksəlməsinə birbaşa təsir göstərir.

İqtisadçı Xalid Kərimli isə diqqəti paytaxtda təhsil alanların yarıdan çoxunun regionlardan gəldiyinə çəkərək problemin əsas həll yolunu universitetlərin yataqxana sistemində görür:

“Universitetə daxil olanların ən azı yarısından çoxu regionlarda yaşayan şəxslərdir və bunlar şəhərə gələndə əlavə bazarda tələb yaradırlar və qiymətlərin qalxmasına və en azı düşməməsinə səbəb olurlar. Tələbələrin bu prosesdən az əziyyət çəkməsinin həllini universitetlər irəli sürməlidir. Universitetlər daha çox tələbəni universitetə cəlb eləmək üçün artıq öz yataqxanalarının müasir tələblərə cavab verən yataqxana sistemini mümkün qədər irəli sürməlidirlər. Yəni burada problem kirayə bazarından çox, universitetlərin tələbələr üçün güzəştli şərtlərlə kirayə qala biləcəyi yataqxana sistemini təklif edə bilməməsidir.”

Yataqxanalar ehtiyacı qarşılamır:

Mövcud statistika göstərir ki, paytaxtın aparıcı ali məktəblərindəki yataqxana yerlərinin sayı tələbələrin ehtiyacının çox kiçik bir hissəsini qarşılayır. Belə ki, Bakı Dövlət Universitetində 220, Azərbaycan Dövlət Memarlıq və İnşaat Universitetində 450, Azərbaycan Dövlət Neft və Sənaye Universitetində 320, Azərbaycan Dillər Universitetində isə cəmi 205 yataqxana yeri mövcuddur.

Yataqxana yerlərinin bu dərəcədə məhdud olması hər il minlərlə tələbəni kütləvi şəkildə kirayə mənzil bazarına yönəldir. Bu baxımdan, problem kompleks şəkildə həll olunmayacağı təqdirdə tələbələrin mənzil təminatı hər tədris ilinin əvvəlində əsas sosial problemlərdən biri olaraq qalacaq.