Beynəlxalq axtarışa verilən türkiyəli jurnalist Azərbaycan dövləti və xalqından üzr istədi

Azərbaycan Respublikasının Baş Prokurorluğu tərəfindən barəsində beynəlxalq axtarış elan edilən Türkiyənin “Şanlıurfa Olay” qəzetinin köşə yazarı Cəlal Çiftçi “X” sosial şəbəkə hesabında geniş müraciət yayımlayaraq Azərbaycan dövlətindən və xalqından rəsmi şəkildə üzr istəyib.

hadiseler.info xəbər verir ki, türkiyəli jurnalist bəyanatında ifadə etdiyi fikirlərdən dərin peşmanlıq duyduğunu qeyd edib:

“Açıqlamalarımın qardaş Azərbaycanda doğurduğu inciklik və kədərə görə peşmanam. İstifadə etdiyim ifadələrin məqsədimi aşması səbəbindən Azərbaycan dövlətindən və Azərbaycan xalqından açıq şəkildə və səmimiyyətlə üzr istəyirəm. Səmimi üzrümün qəbul edilməsini hörmətlə xahiş edirəm. Düşüncələrimi izah edərkən istifadə etdiyim dilin doğura biləcəyi nəticələri daha diqqətlə qiymətləndirməli idim”.

“Azərbaycanın müstəqilliyinə və suverenliyinə hörmətim tamdır”

Cəlal Çiftçi heç bir zaman Azərbaycanın daxili işlərinə qarışmaq və ya iğtişaş yaratmaq niyyətində olmadığını bildirib:

“Azərbaycanın daxili işlərinə müdaxilə etmək, xalqı dövlətə qarşı qaldırmaq, ölkədə iğtişaş yaratmaq, hakimiyyətin zorla ələ keçirilməsini və ya konstitusiya quruluşunun zorla dəyişdirilməsini istəmək kimi bir məqsədim heç vaxt olmayıb və ola da bilməz. Dini nifrət, ədavət və ya ayrı-seçkilik yaratmaq niyyətim də yoxdur.

Azərbaycan qardaş dövlətdir; Azərbaycan xalqı bizim qardaşımızdır. Azərbaycan Respublikasının müstəqilliyinə, suverenliyinə, ərazi bütövlüyünə və konstitusiya quruluşuna hörmətim tamdır. Azərbaycanın gələcəyi ilə bağlı qərarların Azərbaycan xalqına və onun öz konstitusiya qurumlarına aid olduğunun şüurundayam”.

Köşə yazarı bəzi uyğun bilmədiyi paylaşım və məzmunları artıq sildiyini, bundan sonra bəyanatlarında daha diqqətli olacağını vurğulayaraq, aidiyyəti qurumlardan bu müraciətin və niyyətinin ədalətli şəkildə qiymətləndirilməsini xahiş edib: “Sözlərimlə incikliyə səbəb olduğum üçün kədərlənirəm və peşmanam. Azərbaycan dövlətindən və Azərbaycan xalqından bir daha üzr istəyirəm. İki dövlət, tək millət”.