Ceyhun Bayramov BMT Baş Assambleyasının 81-ci sessiyasında çıxış edib  

Azərbaycanın xarici işlər naziri Ceyhun Bayramov Nyu-Yorkda BMT Baş Assambleyasının 81-ci sessiyasında çıxış edib.  

hadiseler.info xəbər verir ki, bu barədə Azərbaycan Xarici İşlər Nazirliyi məlumat yayıb.  

Ceyhun Bayramov beynəlxalq hüquqa və dövlətlərin suverenliyinə əsaslanan yenilənmiş çoxtərəfli sistemin vacibliyini, eyni zamanda BMT Təhlükəsizlik Şurasında islahatların aparılmasının zəruriliyini vurğulayıb. Nazir Vaşinqton Sülh Sammitindən sonra Azərbaycan və Ermənistan arasında de-fakto sülhün əldə olunduğunu və bunun artıq ikitərəfli ticarət kimi konkret iqtisadi nəticələr verdiyini bildirib.  

Çıxışda diqqətə çatdırılan əsas məqamlar:

 Bərpa və Minatəmizləmə: 90 mindən çox vətəndaşın azad edilmiş ərazilərə qayıtdığı, 2020-ci ildən bu yana 400-dən çox, ümumilikdə isə 3 500 nəfərin mina qurbanı olduğu və humanitar minatəmizləmənin 18-ci Milli SDG kimi qəbul edildiyi qeyd olunub.  

 İtkin Düşənlər: Münaqişədən sonrakı barışıq üçün 4 minə yaxın itkin düşmüş şəxsin taleyinin müəyyənləşdirilməsinə beynəlxalq dəstək çağırışı edilib.  

 Logistika və TRIPP: Orta Dəhliz üzrə yükdaşımaların 90 faiz artdığı, Naxçıvana maneəsiz keçid üçün “Beynəlxalq Sülh və Rifah naminə Tramp Marşrutu”nun (TRIPP) və Transxəzər Rəqəmsal İpək Yolu layihəsinin əhəmiyyəti vurğulanıb.  

 İqtisadiyyat və Enerji: ÜDM-in 3 dəfə artdığı, yoxsulluğun 5%-ə endiyi, 16 ölkəyə təbii qaz ixrac edildiyi və 2030-cu ilədək elektrik enerjisinin 40%-nin bərpaolunan mənbələrdən istehsalının hədəfləndiyi bildirilib.  

 İqlim və Ekoloji Çağırışlar: COP29 nəticələri, WUF13-ə ev sahibliyi və Xəzər dənizinin səviyyəsinin azalması problemi diqqətə çatdırılıb.  

 Sosial İnnovasiyalar və Yardım: ASAN və DOST modellərinin uğuru, eləcə də Azərbaycanın 140-dan çox ölkəyə 400 milyon dollardan artıq humanitar və iqtisadi yardım göstərdiyi xatırladılıb.