Daşkənddə Nizami Gəncəvi adına Milli Pedaqoji Universitetin açılışı oldu-FOTOLAR

Avqustun 23-də Azərbaycan Prezidenti İlham Əliyev və Özbəkistan Prezidenti Şavkat Mirziyoyev Daşkənddə Nizami Gəncəvi adına Milli Pedaqoji Universitetin açılış mərasimində iştirak ediblər.

hadiseler.info xəbər verir ki, dövlət başçıları ali təhsil ocağının rəmzi açılış lentini kəsib, kompleksin həyətində ağac əkiblər.

Prezidentlərə universitein tarixi və yaradılan müasir infrastruktur barədə məlumat verilib. Bildirilib ki, 17 mindən çox tələbənin təhsil aldığı ali məktəb Azərbaycanın bir çox aparıcı universitetləri ilə sıx əməkdaşlıq edir. Həmçinin Füzuli şəhərindəki Mirzə Uluqbəy adına 1 nömrəli tam orta məktəbin ilk 5 məzunu qrant əsasında bu universitetdə təhsil almaq hüququ qazanıb.

Özbəkistanın “Yeni Daşkənd” ərazisində 40 hektar sahədə 20 min tələbəlik yeni kampus inşası davam etdirilir. Yeni kampusda Nizami Gəncəvi Muzeyi də fəaliyyət göstərəcək.

Açılışdan sonra İlham Əliyev və Şavkat Mirziyoyev universitetin müəllim və tələbə heyəti ilə görüşərək samimi həmsöhbət olublar.