Daşkəsəndə sel suları yolları bağladı: İri qaya parçaları kəndlə əlaqəni kəsdi

hadiseler.info xəbər verir ki, yağan leysan yağışları nəticəsində Daşkəsən-Mollahəsənli avtomobil yoluna iri qaya parçaları və palçıq kütləsi tökülüb, yol bağlanıb.

Nəticədə kəndin rayon mərkəzi ilə nəqliyyat əlaqəsi kəsilib. Hadisə ilə bağlı Daşkəsən Rayon İcra Hakimiyyətinin başçısı Orxan Abbasov Fövqəladə Hallar Komissiyasının üzvləri ilə birlikdə əraziyə baxış keçirib, mövcud vəziyyətin aradan qaldırılması məqsədilə aidiyyəti qurumlara müvafiq tapşırıqlar verib.

Problemin aradan qaldırılması istiqamətində texnikalar cəlb olunub, yol iri qaya parçaları və palçıq kütləsindən təmizlənərək gediş-gəliş bərpa olunub.

Qeyd edək ki, Daşkəsən rayonunda qeyri-sabit hava şəraiti davam edir.