“Flydubai” təyyarəsində qanlı insident necə başlayıb?- VİDEO

Sentyabrın 30-da “FlyDubai” aviaşirkətinin Dubaydan Təl-Əvivə uçan reysində faciəvi və qanlı insident baş verib.

hadiseler.info xəbər verir ki, uçuşdan təxminən bir saat yarım sonra Oman vətəndaşı olan ikinci pilot kabinədə BƏƏ vətəndaşı olan təyyarə kapitanına bıçaqla hücum edib. Təyyarə dərhal ümumi həyəcan (7700) və beynəlxalq qaçırma siqnalı (7500) yayaraq kursdan kəskin çıxıb və sürətlə hündürlük itirməyə başlayıb.

Sərnişinlərin müdaxiləsi sayəsində hücum edən pilot zərərsizləşdirilib. Məlumata görə, İsraildən olan sərnişinlər təcavüzkarı saxlayıb, təyyarədəki həkim və tibb bacısı isə ağır yaralanan və çoxlu qan itirən kapitana ilkin tibbi yardım göstəriblər. Yaralı pilotlardan birinin öldüyü barədə iddialar olsa da, bu məlumat hələlik rəsmi təsdiqini tapmayıb.

Hava gəmisi Səudiyyə Ərəbistanının Təbuk şəhərindəki aeroporta təcili eniş edib. İstintaq hadisə ilə bağlı iki ana versiyanı — terror aktı və ya ikinci pilotun kəskin psixi pozğunluğunu araşdırır.