Fransa kiberhücum təhlükəsinə görə dövlət saytlarını bağladı

Fransada PHP proqramlaşdırma dilində aşkar edilən kritik təhlükəsizlik boşluğu səbəbindən prefekturaların internet səhifələri müvəqqəti olaraq dayandırılıb.

hadiseler.info xəbər verir ki, bu barədə Fransa Daxili İşlər Nazirliyi məlumat yayıb.

Məlumatda bildirilir ki, Milli İnformasiya Sistemləri Təhlükəsizliyi Agentliyinin (ANSSI) tələbi ilə bir sıra dövlət saytları ehtiyat tədbiri olaraq texniki rejimə keçirilib.

Saytların fəaliyyəti bərpa olunana qədər vətəndaşlara rəsmi elanlar və fövqəladə bildirişlər prefekturaların sosial media hesabları vasitəsilə çatdırılacaq. Nazirlik yeniləmə işlərinin operativ şəkildə tamamlanması üçün tədbirlərin görüldüyünü açıqlayıb.

Qeyd edək ki, sözügedən PHP zəifliyi səbəbindən dünyanın digər ölkələrində də bir çox dövlət qurumlarının internet resurslarına giriş qismən və ya tam məhdudlaşdırılıb.