Gürcüstanda genişmiqyaslı əməliyyat: 142 nəfər saxlanıldı

Gürcüstanda narkotik vasitələrin qanunsuz dövriyyəsinə qarşı keçirilən iri tərkibli əməliyyat-axtarış tədbirləri nəticəsində 142 nəfər saxlanılıb.

hadiseler.info xəbər verir ki, bu barədə Gürcüstanın Daxili İşlər Nazirliyi (DİN) rəsmi məlumat yayıb.

Məlumata əsasən, saxlanılan şəxslər arasında həm Gürcüstan, həm də xarici ölkə vətəndaşları yer alır.

Polis əməkdaşları tərəfindən keçirilən baxış və axtarışlar zamanı saxlanılan şəxslərdən müxtəlif növ külli miqdarda narkotik maddələr, onların qablaşdırılması üçün istifadə olunan xüsusi vasitələr, elektron tərəzilər, narkotiklərin qanunsuz satışından əldə edildiyi ehtimal olunan iri məbləğdə pul vəsaitləri, habelə qanunsuz saxlanılan odlu silahlar və döyüş sursatları aşkar edilərək götürülüb.

Faktla bağlı cinayət işləri başlanılıb, istintaq-əməliyyat tədbirləri davam etdirilir.