Hikmət Hacıyev Beynəlxalq İtkin Düşmüş Şəxslər Günü ilə bağlı paylaşım edib

Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev 30 avqust Beynəlxalq İtkin Düşmüş Şəxslər Günü ilə bağlı rəsmi bəyanat yayıb.

hadiseler.info xəbər verir ki, Prezidentin köməkçisi “X” sosial şəbəkəsindəki hesabında keçmiş Ermənistan-Azərbaycan münaqişəsi nəticəsində 4 010 Azərbaycan vətəndaşının itkin düşmüş kimi qeydiyyatda olduğunu bildirib.

Məsələnin Prezident İlham Əliyevin daim diqqətində olduğunu vurğulayan Hikmət Hacıyev qeyd edib ki, bu günə qədər 32 kütləvi məzar tapılıb və 328 itkin düşmüş şəxsin kimliyi DNT müayinəsi ilə müəyyən edilib. O, həmçinin minlərlə ailənin qeyri-müəyyənliyinə son qoymaq üçün Ermənistan tərəfinin dəfn yerləri barədə dəqiq məlumat verməsinin vacib bir humanitar öhdəlik olduğunu xatırladıb.