Hikmət Hacıyev Yaponiya ilə viza məsələsindən danışdı

Azərbaycan Afrika ölkələri ilə əlaqələri genişləndirir və bu istiqamətdə viza məsələsinin sadələşdirilməsi ehtimala daxildir.

hadiseler.info xəbər verir ki, bunu Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev “Bakı Mədəniyyət və Media Dialoqu Platforması” çərçivəsində keçirilən “Sülhün dili və dezinformasiyaya qarşı mübarizə” mövzusunda xüsusi sessiyada deyib.

Prezidentin köməkçisi Afrikadan olan dövlətlərlə viza prosedurlarının sadələşdirilə biləcəyini qeyd edərək, bu təşəbbüsləri səbirsizliklə gözlədiklərini, lakin bunun qarşılıqlı addımlardan asılı olduğunu bildirib.

Hikmət Hacıyev, həmçinin Azərbaycanın Yaponiya vətəndaşları üçün tətbiq etdiyi və 2027-ci ilin iyulunda başa çatacaq vizasız rejimin müddətinin uzadıla biləcəyinə toxunub:

“Bir il müddətinə vizasız giriş imkanı tətbiq etmişik və bu rejimin uzadılmasını gözləyirik. Lakin hesab edirik ki, bu, qarşılıqlı olmalıdır, çünki bir çox Azərbaycan vətəndaşları da Yaponiyaya səfər etmək istəyərdi. İki ölkənin müvafiq qurumları və Xarici İşlər nazirlikləri tam qarşılıqlı vizasız rejimin tətbiqi məsələsi üzərində birgə işləyə bilərlər. Bu, turizm səfərlərini asanlaşdıracaq və mədəni proqramların genişləndirilməsinə töhfə verəcək”.