Hikmət Hacıyev: “CNN-in Azərbaycanla bağlı dərc etdiyi məqalə tamamilə yanlış idi”

“CNN-in İran-İsrail müharibəsi dövründə Azərbaycanla bağlı dərc etdiyi məqalə tamamilə yanlış idi”.

hadiseler.info xəbər verir ki, bunu Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev “Bakı Mədəniyyət və Media Dialoqu Platforması” çərçivəsində keçirilən “Sülhün dili və dezinformasiyaya qarşı mübarizə” mövzusunda xüsusi sessiyada deyib.

Prezidentin köməkçisi bildirib ki, texniki olaraq bu cür iddiaların reallaşması qeyri-mümkündür:

“İsrail necə hərbi avadanlığı bura daşıya bilər?! Bu olsa, bunu peykdən və ya başqa qurğulardan görmək çox asandır. Bu iddialar mümkün deyildi. Azərbaycan elə coğrafiyada yerləşirdi ki, bu iddialar mümkün deyildi. Bu, yalnız sosial mediada deyil, peşəkar mediada da dezinformasiyaların baş verdiyini göstərir. Bu, Azərbaycan əleyhinə yönəlmiş dezinformasiya kampaniyasının tərkib hissəsi idi. Yəni təkcə jurnalistlər və peşəkar media deyil, həm də diplomatlar bu dezinformasiyanın hədəfi oldular”.

Hikmət Hacıyev qeyd edib ki, əgər jurnalistlər İsrailin Azərbaycanın cənub bölgələrindəki axtarış-xilasetmə missiyası haqqında yazırlarsa, onlar həmin terminologiyanı başa düşməlidirlər: “Axtarış-xilasetmə missiyası deməkdir ki, bu, hərbi gəmiləri, xüsusi təyinatlı əsgərləri və həmçinin logistik bazanı nəzərdə tutur və logistik baza bəzi digər dəstək elementlərini və sairə əhatə edir. Birinci növbədə, siz görürsünüz ki, onlar bu məlumatı yayırlar və heç bir məsuliyyət daşımırlar. Bəzən isə xarici işlər nazirliklərinə müraciət edirlər və bildirirlər ki, bu, rəsmi mənbə tərəfindən təkzib edilib, lakin hələ də istifadə olunur və üzr istənilmir”