Həkimlər 3 yaşlı uşağı xilas ediblər-FOTOLAR

Bakıda 3 yaşlı oğlan uşağının ət maşınında ağır zədələnən sol əli 8 saatlıq mürəkkəb mikrocərrahi əməliyyatla bərpa olunub.

hadiseler.info xəbər verir ki, hadisə zamanı uşağın sol yuxarı ətrafı ət maşınında sıxılıb. Əl biləyi, əl daraqları və dörd barmağı metakarpofalangeal oynaq səviyyəsində tam amputasiya olunan azyaşlı hadisədən 7 saat sonra Səhiyyə Nazirliyinin Ə.Əliyev adına Azərbaycan Dövlət Həkimləri Təkmilləşdirmə İnstitutunun Plastik və Rekonstruktiv Cərrahiyyə Klinikasına çatdırılıb.

Mikrocərrahlar Dilqəm Məmmədov, Bəxtiyar Qasımov, Abidin Həsənli və anestezioloqlar Mail Sədiyev ilə Dayaq Əhmədlinin iştirakı ilə reallaşan əməliyyatda sümük strukturları fiksasiya edilib, bütöv tendon, arteriya və sinir strukturları bərpa olunub.

Kritik postoperativ mərhələni uğurla keçən uşağın hazırda ümumi vəziyyəti qənaətbəxşdir, sol əlində müsbət dinamika müşahidə edilir. Azyaşlı artıq mərhələli reabilitasiya proqramına cəlb olunub.