İlham Əliyev Özbəkistanın Milli İnformasiya Agentliyinə geniş müsahibə verib

hadiseler.info xəbər verir ki, Azərbaycan Respublikasının Prezidenti İlham Əliyev Özbəkistana gözlənilən dövlət səfəri ərəfəsində Özbəkistanın Milli İnformasiya Agentliyinə (UzA) müsahibə verib.

Dövlət başçısı müsahibəsində iki qardaş ölkə arasındakı münasibətlərin ən yüksek müttəfiqlik səviyyəsinə yüksəldiyini vurğulayıb. Prezident İlham Əliyev Özbəkistan Prezidenti Şavkat Mirziyoyev ilə aralarındakı səmimi dostluq və etimadın dövlətlərarası əlaqələrin inkişafında xüsusi rol oynadığını bildirib.

Dövlət başçısı ikitərəfli iqtisadi-ticari göstəricilərə də toxunaraq iki ölkə arasında ticarət dövriyyəsinin kəskin artdığını, 500 milyon dollar kapitalla təsis edilən Azərbaycan-Özbəkistan İnvestisiya Şirkətinin mühüm layihələri maliyyələşdirdiyini diqqətə çatdırıb. Həmçinin neft-qaz, yaşıl enerji, tranzit daşımaları və sənaye sahələrindəki birgə uğurlu təşəbbüslər xüsusi qeyd olunub.

İlham Əliyev mədəni-humanitar sahədəki sıx əlaqələrdən, Füzulidə tikilən Mirzə Uluqbəy adına məktəbdən və Bakıda təməli qoyulan “Özbəkistan” parkından bəhs edərək qarşılıqlı dəstəyə görə təşəkkürünü bildirib. Prezident eyni zamanda Türk Dövlətləri Təşkilatı çərçivəsindəki birliyin və Azərbaycanın Mərkəzi Asiya Dövlət Başçılarının Məşvərət görüşlərində tamhüquqlu iştirakı ilə yaranan “C6” formatının strateji əhəmiyyətini qeyd edib.

Müsahibənin sonunda dövlət başçısı Özbəkistan xalqını müstəqilliyin qarşıdan gələn 35-ci ildönümü münasibətilə təbrik edərək sülh və tərəqqi arzularını çatdırıb.