İlham Əliyev və Şavkat Mirziyoyev mətbuata bəyanatlarla çıxış ediblər-FOTOLAR

Daşkənddə Azərbaycan Prezidenti İlham Əliyev və Özbəkistan Prezidenti Şavkat Mirziyoyev mətbuata bəyanatlarla çıxış ediblər.

hadiseler.info xəbər verir ki, Özbəkistan dövlət başçısının çıxışından sonra Azərbaycan Prezidenti İlham Əliyev bəyanatla çıxış edərək iki ölkə arasındakı müttəfiqlik münasibətlərinin yüksək səviyyədə olduğunu bildirib.

Dövlətimizin başçısı Daşkənddəki sürətli inkişafı və Özbəkistanda aparılan uğurlu islahatları yüksək qiymətləndirib:

“Mən Daşkəndə ilk dəfə səfər etmirəm və hər dəfə buraya gələndə sürətli inkişafın şahidi oluram. Bu gün Daşkənd və bütün Özbəkistan yüksəliş dövrünü yaşayır. Bu isə mənim əziz qardaşım Şavkat Miromonoviçin Özbəkistanın potensialının gücləndirilməsinə, beynəlxalq arenadakı mövqeyinin möhkəmləndirilməsinə yönəlmiş fəaliyyətinin nəticəsidir. Bu gün Mərkəzi Asiya və Azərbaycan böyük potensiala malik vahid geosiyasi və geoiqtisadi regiondur”

Prezident İlham Əliyev iqtisadi sahədəki layihələrə, energetika, nəqliyyat, investisiya və bankçılıq sektorlarındakı geniş əməkdaşlığa toxunaraq Özbəkistanın Qarabağın bərpasındakı xüsusi rolunu bir daha vurğulayıb. Sonda dövlət başçısı ölkələrimizin irəliləmək üçün dəqiq fəaliyyət planına malik olduğunu qeyd edib və Şavkat Mirziyoyevi Azərbaycana dövlət səfərinə dəvət edib.