İndoneziyada vulkan yaxınlığında 5 jurnalist itkin düşüb – VİDEO

İndoneziyanın Anak-Krakatau vulkanı ərazisində reportaj hazırlamağa gedən jurnalistlərlə əlaqə kəsilib.

hadiseler.info xəbər verir ki, bu barədə “TASS” agentliyi məlumat yayıb. Sentyabrın 7-də Banten əyalətindəki Pagedongan limanından yola düşən sürətli katerin göyərtəsində cəmi 7 nəfər olub. Onlardan 5-i mətbuat nümayəndəsi (“ANTARA” informasiya agentliyinin fotojurnalisti M.Baqus Xoyrunnas, “Merdeka”dan Ari Basuki, “iNews”dan Yudhis, “Anadolu”dan Daus və frilanser jurnalist Donal), 2-si isə şəxsiyyəti hələlik məlum olmayan şəxslərdir.

Axtarışların ilk mərhələsi heç bir nəticə verməyib. Davam edən vulkan püskürməsi xilasetmə əməliyyatlarının aparılmasına ciddi maneələr yaradır.

Qeyd edək ki, sentyabrın 6-da Anak-Krakatau vulkanının püskürməsi nəticəsində yaranan kül İndoneziyanın paytaxtı Cakartaya qədər çatıb və hava əlaqəsinə mənfi təsir göstərib. Ölkənin ən böyük hava limanı olan Sukarno-Hatta təyyarələrin qəbulunu və yola salınmasını müvəqqəti dayandırıb.