“İşləməyən şəxslər də vəfat edəndə dəfn pulu ödənilsin”

Azərbaycanda işləməyən şəxslərin də vəfatı zamanı onların ailələrinə dəfn pulunun ödənilməsi məqsədəuyğun olar.

hadiseler.info xəbər verir ki, bunu deputat Vüqar Bayramov Milli Məclisin komitə iclasında Dövlət Sosial Müdafiə Fondunun (DSMF) və İşsizlikdən Sığorta Fondunun 2027-ci il üçün büdcə layihələrinin müzakirəsi zamanı bildirib.

Deputat qeyd edib ki, mövcud qaydalara əsasən, dəfn pulu yalnız dövlət qulluqçuları, pensiyaçıları, işsizlikdən sığorta ödənişi alan və sığortaolunan şəxslər vəfat etdikdə ödənilir. Lakin işləməyən şəxs dünyasını dəyişən zaman onun ailəsinin bu dəstəyə daha çox ehtiyacı yaranır:

“2025-ci ildə Azərbaycanda dünyasını dəyişənlərin ümumi sayı 33 806 nəfər olub. Onların 62,6 faizi isə 65 və yuxarı yaşda olub, yəni əksəriyyəti pensiyaçı olub. Göründüyü kimi, bu təklif əlavə ciddi izafi xərc yaratmayacaq”.
Müzakirələr zamanı parlamentari DSMF büdcəsinin gəlir və xərcləri, məcburi dövlət sosial sığorta haqlarının proqnozlaşdırılması, eləcə də İşsizlikdən Sığorta Fondunun vəsaitlərinin istiqamətləri ilə bağlı digər təklif və iradlarını da səsləndirib.