İstanbulda sel felakətində ölənlərin sayı artıb

İstanbulda aramsız yağan leysan yağışlarının törətdiyi dəhşətli sel fəlakətində can itkisi artmaqda davam edir.

hadiseler.info “DHA”ya istinadən xəbər verir ki, aparılan axtarış-xilasetmə tədbirləri nəticəsində seldə itkin düşən daha iki nəfərin meyiti aşkarlanıb. Bununla da təbii fəlakət nəticəsində həyatını itirənlərin sayı 6-ya çatıb.

Məlumata görə, Sarıyer rayonunun Ayazağa qəsəbəsində sel sularına düşərək itkin düşən 30 yaşlı Türkmənistan vətəndaşı Murat Babacanovun cəsədi Haliç dəniz sahilində Dəniz Polisi və polis helikopterinin birgə əməliyyatı zamanı tapılıb.

Bundan başqa, Kocaeli vilayətinin Qəbzə rayonunda avtomobildə ikən selə düşən iki nəfərdən birinin də cəsədi İstanbulun Pendik rayonu ərazisində aşkarlanıb.

Fövqəladə Hallar İdarəsinin (AFAD) və təhlükəsizlik qüvvələrinin xilasediciləri sel zamanı itkin düşmüş daha 2 nəfərin tapılması istiqamətində axtarış-xilasetmə işlərini fasiləsiz olaraq davam etdirirlər.